進入更年期前後（早至40/45-55歲左右），明明飲食冇乜大改變，甚至比後生嘅時候食得更少，但係體重同體脂就節節上升，肚腩仲變得越嚟越明顯，咁究竟應該點應對呢？輕斷食 / 唔食飯有冇幫助呢？

 

成因：更年期因為荷爾蒙嘅變化，例如係卵巢分泌嘅雌激素同黃體素減少，令到脂肪更多地囤積喺肚腩。

 

內臟脂肪：更年期前後，內臟脂肪嘅增加約50%。而喺呢段期間，更年期嘅症狀易令人缺乏優質睡眠、更會干擾食慾荷爾蒙，令人容易覺得肚餓，仲會誘發對唔同食物嘅慾望。 


所以，我建議讀者要從幾方面着手：

 

  1. 飲食上，記得將碳水化合物集中喺晏晝食，夜晚有需要就食少量，亦都可以試吓做「碳循環」；每餐都記得要盡量先食纖維，而每日都要奉行高纖、高蛋白同低碳嘅飲食（但唔可以唔食碳水）
     

  2. 食飽要行吓：就算唔做任何運動，都記得一定要行返10-20分鐘。平時盡量唔好長期坐，每個鐘都起身大概5分鐘--- 去下廁所、斟水，總之就搵啲嘢做吓咁。呢個對於減少囤積脂肪、穩定血糖非常有幫助。

     

  3. 一定要諗辦法瞓得好：瞓得少或者瞓得唔好其實最傷身、最容易令人肥嘅，唔單止會令第二日嘅血糖非常差，亦都會令人對油炸、高糖、高脂肪嘅嘢有強烈嘅渴望。想瞓得好啲可以搵我，我都算係半個「睡眠專家」。
     

  4. 每日只係喺指定2-3個時段食嘢：即係除咗早午晚三餐之外，其他時間唔好覺得冇嘢做就食幾塊餅、然後又食幾粒朱古力、轉個頭可能又會想食少少生果咁樣（老實講，我係超級鍾意咁樣做，因為成日發口痕）。但呢一個「頻繁飲食」嘅方式，亦都係最致肥嘅（同血糖波動有關）。