罕‼️無論幾點經過都「爆場」嘅去骨海南雞專門店。今時今日，認真唔容易。

啖啖肉嘅去骨海南雞、頂級油飯、濃香椰子雞湯，跟餐仲有一碟菜，包埋嘢飲都只係$74 ！難怪晏晝、下午茶，甚至晏晝四點都係爆場，門口仲長期有人喺度等外賣/等位。

除咗油飯好食，佢哋點雞嘅濃稠甜豉油、蒜蓉辣醬同埋薑蓉都有99分！所有雞都係去骨嘅，大大碟、啖啖肉！加埋三款醬汁，大滿足！

跟餐仲有濃郁嘅椰子雞湯，唔肥膩，仲有幽幽嘅雞油香，趁熱飲，非常正！

😆戴定頭盔🪖先：呢間餐廳嘅座位非常緊張，如果係繁忙時間就一定要等，而且100%要搭枱嘅，介意嘅朋友就要繞路🙏🏻

😋 如果你係第一次去，首選佢哋嘅海南雞雙拼煎瑤柱鹹魚肉餅一人餐。海南雞出色，鹹魚肉餅煎起非常香口，而且條味適中，白飯/油飯記得叫多飯！

🤤 如果有同行嘅朋友，我會建議你試埋佢哋嘅金沙香蒜海南雞飯。不過講明先，食完之後就唔好咁近同人傾偈🤪☝🏻

想食得健康啲，油菜可以叫全走，個餐一嚟就食咗菜同飲湯打底先。

（仲記唔記得直播講嘅「520菜菜肉肉飯」？想食得健康，記得盡量執行啊☺️👌🏻）

跟餐仲可以叫嘢飲，我最鍾意係檸樂！可以揀無糖可樂，只係$8

同場加映，隔籬位嘅海南雞叻沙！我見佢食到湯都飲晒，有興趣嘅朋友不妨一試。

如果鍾意食肉骨茶，跟餐都可以加$25 upgrade㗎。


 

雞仔去骨海南雞專門店
荃灣大壩街75號地下8號舖
（荃灣廣場旁）
電話： 6966 6858

 

其他分店：長沙灣元州街493號地下、長沙灣青山道232號地下 及 大角咀埃華街大眾樓地下。