首先，我唔贊成「零碳水」，因為會甩頭髮、有抑鬱傾向、影響腦部日常運作、個人唔精神，長遠仲會影響整體嘅健康。

 

其次，其實食碳水化合物係完全冇問題嘅，尤其係有運動嘅日子，可以食多少少；喺冇運動嘅日子，就食少啲啲，呢個就為之「間歇高低碳」。

 

最後，如果唔想咁麻煩，我建議可以直接行「低碳飲食」。意思係：每日可以食一大碗飯 / 或者起碼有60-70克嘅碳水化合物，酸種麵包、豆類、蕎麥麵、五穀飯等等。

 

盡量減少食白飯、白麵包；如果真係要食，留意一片多士就有約20克嘅碳水、一平碗飯大概就係45克碳水。呢度加埋就已經係全日嘅碳水化合物份量。

 

以上係大概100-120磅左右嘅朋友，「低碳期」所需要嘅碳水化合物份量。

 

如果當日仲有薯仔、芋頭、粟米、蘋果、香蕉、南瓜、番薯等等，咁真係會容易肥，因為呢啲都係「高碳水+糖」嘅食物。
 

平日食嘢可以多啲留意佢哋，因為佢哋唔單止係蔬菜 或 生果，有好多食物其實係有多過一個身份㗎。

 

爭啲唔記得講：覺得食咗碳水會「肥」，其實只係會「重」兩三磅（水），你個脂肪比例其實唔會因為食一碗飯而有咩改變。

 

咁點解食一碗飯會重咗？因為碳水化合物好吸水。舉例：你晚餐忽然食一大碗飯，跟住第二日重咗一磅其實係好正常，因為每1克嘅碳水會吸4克左右嘅水，所以你會重咗啲水，但其實你唔會肥咗。
 

結論：放心，食適量嘅碳水化合物，長時間避開飯、根莖類、豆類或者果仁類等，只會令人食得更多肉、汁、同埋更肥嘅嘢去填肚。

 

如果對於瘦身或者食物嘅身份有任何疑問，隨時WhatsApp我，唔好咁客氣：66881970 Kay